*Ole Petter Hatlevoll, konsernsjef digitale tenester Sognekraft.*

Sognenett IT blir i 2026 fusjonert inn i Sognenett. Formålet er eit meir samla fagmiljø, ei tydelegare merkevare og eit meir komplett tenestetilbod til kundane.

– Dette er eit naturleg steg for å vidareutvikla Sognenett og styrka vår leveranse til kunden inn mot framtida, seier Ole Petter Hatlevoll, konserndirektør for digitale tenester i Sognekraft og dagleg leiar i Sognenett.

Ei utvikling driven av marknaden

Sognenett IT vart etablert i 2023, og har sidan då utvikla seg til eit kompetent fagmiljø med eit tosifra tal tilsette og høg regional bedriftsaktivitet, med kontorstad i Vik, Sogndal og Gaupne. Hatlevoll fortel at samstundes som IT-selskapet har vekse har etterspurnaden etter heilskaplege digitale IT-tenester auka, og skiljet mellom tradisjonelle internettleverandørar og IT-selskap har blitt mindre.

– Marknaden er i stadig endring, og næringslivet møter aukande krav til både digitalisering, effektivisering og tryggleik. Det gjer at behovet for tenester i ei meir komplett pakke har blitt tydelegare. Når me no vel å samla selskapa, kan me gi kundane ei endå betre og meir heilskapleg digital leveranse – og slik sett verta endå meir konkurransedyktige, seier Hatlevoll.

På spørsmål om kvifor dette ikkje vart gjort frå starten av, peikar Hatlevoll på at føresetnadene var annleis då Sognenett IT vart etablert.

– Då Sognenett IT vart etablert, var det fleire omsyn som gjorde det rett å organisera verksemda som eit eige selskap. Eigarskapet var annleis, og me var i ein fase der det var viktig å byggja opp eit nytt forretningsområde med tydeleg ansvar og rom for å utvikla både kundebase og leveransemodell, seier han.

Nyleg vart Sognenett eineeigar av Sognenett IT, etter å ha kjøpt opp dei resterande eigarandelane. Dermed låg også forholda til rette for å samla verksemda i eitt selskap.

Eit større og meir samla fagmiljø

Tore Bø har vore dagleg leiar i Sognenett IT sidan starten av driftssatsinga. Han peikar, som Hatlevoll, på endringar i marknaden som gjer at dette no vert eit naturleg steg.

– Me har hatt god utvikling, og etterspurnaden etter IT-tenestene våre er no så stor at me måtte ha tilsett mange fleire for å imøtekoma dette. Behovet for kapasitet og breiare kompetanse har blitt tydelegare, seier Bø, som no trer inn i rolla som leiar for rådgjeving og tenester i Sognenett.

*Tore Bø ser fram mot endringa og gler seg til å ta fatt på nye utfordringar i eit selskap med alle tenestane samla under ein paraply.*

– Ved å samla verksemdene kan me byggja vidare i eit større og meir robust fagmiljø, og samtidig sikra god og stabil oppfølging av kundane, held han fram.

Hatlevoll peikar på det sterke fundamentet som er bygd opp i Sognenett IT.

– Sognenett IT har på kort tid bygd opp eit sterkt kompetansemiljø og ein solid kundebase. Med fusjoneringa får me ei samla og styrka merkevare, seier Hatlevoll.