Svein er ny seniorkonsulent: - Gode moglegheiter for å utvikla meg vidare

Svein Sivertsen tok nyleg til i den nye jobben i Sognenett.

– Det som lokka meg med jobben, var moglegheita til å kombinere den breie erfaringa mi med noko av det eg interesserer meg aller mest for: IT-sikkerheit, seier Svein Sivertsen. 

Nyleg tok han fatt på stillinga som seniorkonsulent i Sognenett. Her skal han arbeide med alt frå feilsøking og teknisk arkitektur til drift og tryggleik for kundane. 

Svein Sivertsen kjem frå stillinga som IT- og kontraktsansvarleg i AGTunnel. Før det har han arbeidd både som gründer og teknikar innan reparasjon, drift og IT-tenester, mellom anna gjennom sitt eige selskap Total Repairs.  

– Eg har skrudd på det meste, frå kretskort og maskinvare til nettverk og skytenester. Det er nettopp denne breidda eg no får brukt vidare i den nye rolla, seier han. 

Opphavleg kjem Svein Sivertsen frå Bergen. Etter ti år i Sogndal kjøpte han og kona bustad og etablerte seg på Hafslo. 

Moglegheita til å bli ein del av eit sterkt, lokalt kompetansemiljø var viktig då han godtok et jobbtilbud fra Sognenett. 

– Her får eg jobbe med spennande kundar og kritisk infrastruktur, samtidig som eg har dyktige kollegaer å sparre med. Det gir gode moglegheiter til å utvikla meg vidare, seier han. 

Teknologi på jobb - og fritid

Når arbeidsdagen er over, går mykje av fritida med til interesser innan teknologi. 

Svein likar mellom anna gaming og sim racing, og brukar òg mykje tid på å studere IT-sikkerheit. 

I tillegg står både reising og friluftsliv på programmet når høvet byr seg. 

– Eg er òg over gjennomsnittet glad i bacon, legg han til. 

Ser fram til å kome i gang

No ser Svein fram til å bli betre kjend med både kollegaene, kundane og arbeidskvardagen i Sognenett. 

– Eg gler meg til å kome skikkeleg i gang og ta fatt på spennande og utfordrande oppgåver saman med resten av laget, seier han.